Equinor inngjekk i går intensjonsavtalar med sju europeiske verksemder om å utvikla verdikjeder for karbonfangst og lagring.
Intensjonsavtalane er inngått med Air Liquide, Arcelor Mittal, Ervia, Fortum Oyj, HeidelbergCement AG, Preem, og Stockholm Exergi. Avtalane legg opp til samarbeid om mogeleg behandling av CO₂ ved deira anlegg og transport til Northern Lights-prosjektet, ifølgje ei melding frå Equinor.
Korvidt intensjonsavtalane nokon gong fører til kommersielle avtalar, avheng av fleire faktorar.
Det er mange som utolmodig ventar på at Regjeringa skal opna pengesekken og velsigna planane for å utvikla teknologi for fullskala fangst og lagring av CO2 (Carbon Capture and storage – CCS). Ei positiv avgjerd i Regjeringa i statsbudsjettet i 2020 om å satsa på fullskala karbonfangst og lagring vil vera avgjerande.
Northern Light er namnet på oljeselskapa Equinor, Shell og Total sitt felles prosjekt for karbonfangst og lagring. CO2 skal fangast frå store industrianlegg i Norge og i utlandet, sendast med skip til eit mellombels lageranlegg på Kollsnes og derifrå sendast i rør til permanent lagring i eit reservoar under Nordsjøen.
Til sist vil ei eventuell verkeleggjering av intensjonsavtalane avhenga av lønsemda for tredjepartar involverte i dei einskilde fasane av prosjektet.
Dei meir enn 150 personane som er involverte i Northern Light jobbar no med å redusera kostnadane.
Les: Klimaministeren på Kollsnes: Kostnadane på CO2-fangst må ned
